Tetzahuitl (Nahuatl)Mural Saner 2022
[§0] Injc ce capitulo vncã mjtoa in nez, in mottac in machiotl yoã in tetzavitl, in aiamo valhuj españoles, in njcan tlalli ipan, in aiamo no iximachoa in njcã chaneque.
[§1] In aiamo vallaci españoles, oc matlacxivitl, centlamãtli tetzavitl achto nez, ilhujcatitech, iuhquj in tlemjiaoatl, iuhquj in tlecueçalutl, iuhqujn tlavizcalli, pipixauhticaca injc necia, iuhq›n ilhujcatl qujçoticac: tzimpatlaoac, quapitzaoac: vel inepantla in ilhujcatl; vel yiollo in aciticac ilhujcatl, vel ilhujca iollotitech aciticac, in iuh ittoia vmpa tlapcopa: in oalmoquetzaia, oiuh onqujz ioalnepantla in necia tlatviliaia, ipan tlatvia, q›n iehoatl qujoalpoloaia in tonatiuh, in jquac oalqujçaia: vel ce xivitl in oalmoquetzaia (ipan matlactli omume calli in peuh). Auh in jquac necia tlacaoacaia, netenvitecoia, neiçaviloia, tlatemmachoia.
[§2] Injc vntetl tetzavitl muchiuh, njcan mexico: çan monomavi in tlatlac, cuetlan, aiac ma qujtlecavi, çan monoma tlecavi in jcal diablo vitzilobuchtli: mjtoaia, iteioc itocaiocan Tlacateccan: in nez ie tlatla in tlaquetzalli, in jtec, oalqujça in tlemjiaoatl, in tlenenepilli, in tlecueçalutl, cenca çan iciuhca compalo in ixqujch calquavitl: njman ie ic tlacaoaca, qujtoa. Mexicae ma vallatotoca, tlaceviloz, amaapilol: auh in jquac caatequjaia, in qujceviznequja, çan ie ilhujce mopitza, aocmo vel ceuh, vel tlatlac.
[§3] Injc etetl tetzavitl: vitecoc ipan tlatlatzin teucalli, çan xacalli catca, itocaiocan tzũmulco: iteupan in xiuhtecutli, amo tilaoaia, çan aoachqujavia in juh tetzammachoc: iuh mjtoa in ça çan tonalhujtecoc, amono caqujztic in tlatlatzinjliztli.
[§4] Injc nauhtetl tetzavitl: oc vnca in tonatiuh in xivitl vetz ieteietia, vmpa oalpeuh in tonatiuh icalaqujampa; auh vmpa itztia in jqujçaianpa, iuhquj in tlesuchtli pipixauhtiuh, veca mocujtlapiltitiuh, veca acitiuh in jcujtlapil: auh in oittoc cẽca tlacaoacac, iuhqujn oiovalli õmoman.
[§5] Injc macujltetl tetzavitl: poçon in atl, amo iehecatl qujpoçonalti, iuhqujn momomoloca, iuhqujn xixittemomoloca, cenca veca in ia, injc macoquetz: auh in calli tzitzintla cacic, auh capapachiuh, xixitin in calli: iehoatl in vei atl totlan manj njcan mexico.
[§6] Injc chiquacentlamantli tetzavitl: mjecpa cioatl cacoia chocatiuh, tzatzitiuh, ioaltica cenca tzatzi; qujtotinemj. Nonopilhoantzitzin, ie ic çan ie tonvi: in quenmanjan qujtoa. Nonopilhoantzitzin, campa namechnoviqujliz.
[§7] Injc chicuntlamantli tetzavitl: ceppa tlatlamaia, manoço tlamatlaviaia in atlaca; centetl cacique tototl nextic, iuhqujn tocujlcoiotl: njmã qujttitito in Motecuçoma, tlillan, calmecac: ommotzcalo in tonatiuh, oc tlaca, iuhq›n tezcatl icpac manj, malacachtic, tevilacachtic, iuhqujn xapotticac: vmpa onnecia in ilhujcatl, in cicitlaltin, in mamalhoaztli. Auh in motecuçoma, cenca qujmotetzavi in jquac qujmjttac cicitlaltin, yoã mamalhoaztli. Auh injc vppa ontlachix in jcpac tototl, enequjttac, iuhquj on in ma acame, moquequetztivitze, tepeuhtivitze, moiaochichiuhtivitze, qujnmama mamaça. Auh njman qujnnotz in tlaciuhque, in tlamatinjme: qujmjlhuj: Amo anqujmati in tlein onoconjttac, iuhqujn acame moquequetztivitze: auh ie qujnanqujlizquja, in conjttaque, opoliuh, aoc tle qujtoque.
[§8] Injc chicuetetl tetzavitl: mjecpa motenextiliaia, tlaca, tlacanetzolti, ontetzontecomeque, çan çe in intlac, vmpa qujmõvicaia in tlillan calmecac, vmpa qujmjttaia in motecuçoma, in oqujmjttac njmã polivia.
